Pulau Kemaro (Kembaro) - Bahasa Palembang

Bismillahirrahmanirrahim...

Setetak cerito dari Pulau Kemaro

Ujung  Desember tadi, kami sekeluargo sanjo ke Pulau Kemaro. Kulo yg lahir besak di Plembang, baru inila tejejak kaki disano, padahal dari kecik la nenger namo pulau kemaro, mungkin karno baru inila pulau kecik ini diurusi, dibuatke dermaga dan perahu siap sedio kulu kilir dari bawah Ampera.

Nyampe disano, disambut gerbang abang, jalan dikit sampe di kelenteng, disebelahnyo ado Batu dengan tulisan Mitos Pulau Kemaro, yang becerito soal Tan Bun An dan Siti Fatimah yg bejodoh terus tewas karno nyelem nak ngambek guci berisi emas yg terlanjur dibuang, dio beduo nyelem dan idak nimbul lagi.

Terus kami befoto di kelenteng, singgonyo kiri kanan depan belakang. Terus ke belakang befoto lagi di pagoda yg ngetop itu.

Sambil istirahat abis foto-foto, mato tetuju ke belakang pagoda, keujung pulau sikok lagi. Sambil santai cuci mato kulo becerito ke anak bujang kulo;

 “Nak, dulu jaman bingen diujung pulau sebela sano ado benteng Kerajaan Palembang, bukan benteng dalam artian bangunan, karno pulau ini sebenernyo benteng. Diujung situ dulu bejejer Meriam dan pasukan Kerajaan Palembang yang siap betempur ngelawan siapo bae yang nak nyerbu Palembang. Di belakang kito ado pabrik PUSRI, disitu dulu ado Keraton Kuto Gawang. Taon 1605 waktu Perang Banten-Palembang pulau inila yang harus ditembus sebelum musuh sampe ke Keraton. Taon 1659 waktu Belando nyerang, pulau ini jugo yg musti ditembus dulu, baru belando pacak sampe ke Keraton Kuto Gawang, waktu itu keraton hancur dibakar belando, Rajo Side Ing Rajek tepakso, mundur ke sako tigo dan wafat disano. Waktu Perang Menteng, perang terakhir dengen belando taon 1821, duo kali belando nyubo tapi dak pacak nembus pulau ini ditambah 2 benteng dikiri kanan Mangun Jayo samo Tambak Jayo. Yang ketigo baru tembus karno blando berkhianat samo perjanjian yg dibuat dan tembus sampe Keraton Kuto Besak”.

Anak bujang manggut-manggut entah ngerti entah idak.

Waktu di perahu nak balek kulo becerito lagi;

“Nak, kau la maco cerito dibatu tadi, itu mitos atau legenda, sebenernyo ado legenda sikok lagi selain itu, mak ini ceritonyo; Dulu ado bajak laut terkenal yg markasnyo di pulau ini, namonyo Tan Gu Ci. Dio nguasoi sungi Musi, selat Bangka sampe selat Malaka. Perantau Cino yang ado di Plembang maluan, laju ngirim kabar ke Kaisar Cino kalu ado wong cino jadi perompak disini. Dikirimla Laksamana Cheng Ho untuk nangkep Tan Gu Ci karno la mikin malu Cino. Kapal Cheng Ho merapat di Pulau Bangka dan bikin cerito kalu mereka adalah rombongan bajak laut dari Cino. Dapet Kabar itu Tan Gu Ci ngirim undangan yang diterimo oleh Cheng Ho. Belayarla Cheng Ho pake perahu kecik, merapat di pulau kemaro turun dewe’an kareno undangan cuman buat dio bae, anak buahnyo yang diperahu neruske belayar, minggir di 7 ulu dan muat markas di Jaka Baring. Waktu Cheng Ho betemu Tan Gu Ci, ditawa’i arak dak galak, ditawa’i betino dak galak (karno muslim), Tan Gu Ci laju curiga, akhirnyo tebongkar kalu Cheng Ho utusan Kaisar yang nak nangkep dio. Terjadi duel antara Tan Gu ci dengen Cheng Ho yang ujungnyo tewasnyo Tan Gu Ci. Kepalaknyo dibawa Cheng Ho untuk diserahkan ke Kaisar Cino, badannyo dikubur di kuburan cino seberang Nago Swidak”.

Anak bujang manggut-manggut lagi sambil mikir, jangan-jangan ubaknyo ni lagi kesurupan.

Itu bae setetak cerito dari pulau kemaro yang dulu disebut Pulau Kembaro (Kembare/bhs Besemah. Kembara/bhs Indonesia).

Wassalam

------- ilalang -------